స్పీకర్ ఎలెవెన్ వర్సెస్ ‘మా’ ఎలెవెన్ క్రికెట్ మ్యాచ్

ఎల్బీ స్టేడియం, న్యూస్‌లైన్: రాష్ట్ర లెజిస్లేటివ్ క్రీడల్లో భాగంగా ఎల్బీ స్టేడియంలో నేటి (బుధవారం) సాయంత్రం
ఎమ్మెల్యేలు, మూవీ ఆర్టిస్ట్స్ అసోసియేషన్ (మా) మధ్య క్రికెట్ మ్యాచ్ జరగనుంది. రాష్ట్ర లెజిస్లేటివ్ క్రికెట్ జట్టుకు కెప్టెన్‌గా స్పీకర్ నాదెండ్ల మనోహర్ వ్యవహరిస్తుండగా.. ‘మా’ తరపున పాల్గొనే సినీ స్టార్స్ జట్టుకు అక్కినేని నాగార్జున సారథ్యం వహించనున్నారు. ఈ మ్యాచ్‌లో పాల్గొనే ఆటగాళ్ల జాబితాను ఇప్పటికే మూవీ ఆర్టిస్ట్స్ అసోసియేషన్ ప్రకటించింది.
అయితే రాష్ట్ర లెజిస్లేటివ్స్ జట్టు తరఫున పాల్గొనే ఆటగాళ్ల సంఖ్య ఎక్కువగా ఉండడంతో తుది జట్టు జాబితాను ఖరారు చేసేందుకు లెజిస్లేటివ్ క్రీడల కో-ఆర్డినేటర్ ఏరాసు ప్రతాప్‌రెడ్డి, కన్వీనర్ కె .లక్ష్మారెడ్డి కసరత్తు చేస్తున్నారు. స్వతహాగా ముఖ్యమంత్రి కిరణ్‌కుమార్‌రెడ్డి క్రికెటర్ కావడంతో ఈ మ్యాచ్‌లో పాల్గొనే అవకాశం లేకపోలేదని ఓ ఎమ్మెల్యే తెలిపారు.

స్పీకర్ ఎలెవెన్: నాదెండ్ల మనోహర్ (కెప్టెన్), ఏరాసు ప్రతాప్‌రెడ్డి, కేఎల్‌ఆర్, సురేష్, రాజేష్, జోగి రమేష్, బి.శివప్రసాద్ రెడ్డి, అహ్మద్ బలాల, వేణుగోపాలచారి, శివరామిరెడ్డి, ఎస్.శ్రీరామ్, బి.రామనాయుడు, జూలకంటి రంగారెడ్డి, కాటసాని రాంభూపాల్‌రెడ్డి, పి.రవి, కేఎస్‌ఎన్.రాజు.

‘మా’ ఎలెవెన్: నాగార్జున(కెప్టెన్), శ్రీకాంత్, తరుణ్, నితిన్, నరేష్, ఆదర్శ్, నాని, రాజీవ్ కనకాల, అజయ్, రఘు, ప్రభు, నందకిషోర్, తారక్, ఖయ్యూం, మింటో, చిత్రం శ్రీనివాస్, సామ్రాట్, కార్తీక్, శివాజీరాజా, భూపాల్.